Noyabrın 5-də Təhsildə Yeni Çağırışlar III Beynəlxalq Forumu keçiriləcək. Beynəlxalq Forum Elm və Təhsil Nazirliyi, İqtisadi Əməkdaşlıq və İnkişaf Təşkilatı (İƏİT), Təhsilin İnkişafı Fondunun tərəfdaşlığı, "T-Network" təhsil işçilərinin təcrübə və kommunikasiya platforması və Təhsil İnstitutunun təşkilatçılığı, Təhsil TV”, “Azərbaycan müəllimi” qəzeti və “Azərbaycan məktəbi” jurnalının media dəstəyi ilə hibrid formatda keçiriləcək.
Forumun əsas məqsədi təhsildə yeni çağırışları müzakirə etmək, yeni dövrün təhsil tələblərini nəzərdən keçirərək keyfiyyətin daha da yüksəldilməsinə nail olmaqdır.
Forumda iştirak ödənişsizdir. Əyani iştirak yalnız dəvətnamə ilə mümkündür. Dəvətnamələr Beynəlxalq Forumun Təşkilat Komitəsi tərəfindən yalnız qonaqlara təqdim ediləcək.
İştirak üçün müvafiq qeydiyyat linkinə keçid edə bilərsiniz: Qeydiyyat!
“Daha təhsilli gələcək" şüarı ilə baş tutacaq Beynəlxalq Forum rəqəmsal dünyada öyrənmək və qlobal səriştələr mövzularını əhatə edəcək.
Beynəlxalq Forum çərçivəsində “Rəqəmsal dünyada öyrənmək necə təşkil edilməlidir?”, “Hansı yeni yanaşmalara, yeni məktəb modellərinə ehtiyac var?”, “Təhsildə təlim prosesinin və məzmunun gələcəyi necə olacaq?”, “Məktəb həyatını həyat məktəbinə çevirmək üçün hansı çağırışlara cavab verilməlidir?”, “Gələcəyə necə insan hazırlamalıyıq?”, “Yeni çağırışlar təhsilin məqsədi və vəzifələrini hansı istiqamətdə dəyişir və ya dəyişməlidir?" sualları müzakirə olunacaq.
Beynəlxalq Forum "Azərbaycan 2030: Sosial-iqtisadi inkişafa dair Milli Prioritetlər" sənədinin "XXI əsrin tələblərinə uyğun təhsil" istiqamətini, İƏİT-in "Təhsil və bacarıqların gələcəyi - 2030" sənədini, Birləşmiş Millətlər Təşkilatının Dayanıqlı inkişaf məqsədlərindən biri olan keyfiyyətli təhsil məqsədini rəhbər tutur.
Beynəlxalq Forumun əsas məruzəçisi İƏİT-in Baş katibinin təhsil siyasəti üzrə xüsusi müşaviri, Təhsil və Bacarıqlar üzrə direktoru Andreas Şleyxer olacaq. Beynəlxalq forumun digər spikerləri barədə yaxın günlərdə məlumat veriləcək.
Sonda arzu edən iştirakçılara beynəlxalq sertifikat təqdim ediləcək. Beynəlxalq sertifikatlı qeydiyyat üçün yerlər məhduddur.

T-NETWORK nədir?


“T-NETWORK” - Azərbaycan Respublikası Elm və Təhsil Nazirliyinin dəstəyi ilə yaradılan təcrübə mübadiləsi və kommunikasiya platformasıdır. İdeya “Təhsilin inkişafı üzrə Dövlət Strategiyası”nın istiqamətlərindən biri olan təhsil sahəsində insan resurslarının müasirləşdirilməsi bəndinə əsaslanır və strategiyanın təhsillə bağlı media və internet resurslarının inkişafının təmin edilməsi məqsədinə xidmət edir.

MƏQSƏD


Yerli və əcnəbi təhsil işçilərinin kommunikasiyasına şərait yaratmaq;
Yerli və əcnəbi təhsil işçilərinin arasında fikir körpüsü qurmaq;
Təcrübə mübadiləsinə şərait yaratmaq üçün müxtəlif formatlı online və canlı tədbirlər, görüşlər, forumlar, səfərlər təşkil etmək;
Çağdaş təhsil mövzularında müzakirələr və tədqiqatlar aparmaq;
Təhsilverənlərin ehtiyaclarını müəyyənləşdirmək,
Ekspertlər cəlb etməklə təhsil sahəsində olan ehtiyacları təmin etmək yolları ilə bağlı təkliflər hazırlamaq;
Müəllimlərin peşəkarlıq səviyyəsini artırmaq, yeni əməkdaşlıqlara vəsilə olmaq, bir sözlə, inkişaf sinerjisi yaratmaqdır.

İSTİQAMƏT


“T-Network”-un 4 əsas fəaliyyət istiqaməti var:
Təhsil işçilərinin yerli və beynəlxalq əməkdaşlığı və müxtəlif tərəfdaşların iştirakı ilə çağdaş təhsil mövzularında müzakirələrin təşkili;
Müxtəlif mövzularda tədqiqatların aparılması və ictimai rəyin öyrənilməsi;
Tədqiqat əsaslı yeni təklif və layihələrin hazırlanması, tətbiq edilməsi;
Müxtəlif mövzularda online və ofline təlim, tədris proqramlarının təşkili.